Tradición y anovación danse la mano en Sotres, que sollerta del "peligru d'estinción"

La familia real percuerre per más de tres hores el Pueblu Exemplar 2024

Tradición y anovación danse la mano en Sotres, nel corazón de los Picos d'Europa, un pueblu de monte asturianu que visitaron esti sábadu los reis, la princesa Leonor y la infanta Sofía p'apurrir el premiu al Pueblu Exemplar 2024. Los sos vecinos alvirtieron que tán en peligru d'estinción.

Per más de tres hores, la familia real percorrió les cais d'esti pueblu del conceyu de Cabrales, asitiáu a 1.050 metros d'altitú -unu de los de mayor altitú del Principáu- y con 108 habitantes, asitiáu na Reserva de la Biosfera (Unesco) y Parque Nacional de los Picos d'Europa.

Un pueblu de monte nel que vivir, como destacó la princesa d'Asturies, supón un”desafíu constante". Y los sos vecinos son un exemplu "pola so capacidá pa curiar les tradiciones y p'anovar", daqué que nun ye fácil.

Y nun lo ye, como destacó Jessica López, vocal de l'Asociación de Vecinos de Sotres, qu'alvirtió que tán "en peligru d'estinción": "necesitamos sofitu pa siguir alantre" porque quieren quedar nel so pueblu pero teniendo infraestructures mientres siguen lluchando por caltener vives les tradiciones.

La familia real conoció nel pueblu la so actividá económica basada na ganadería y el campu, el turismu y negocios agroalimentarios especializaos na ellaboración del quesu Cabrales.

Unu de los primeros alcuentros que caltuvieron foi colos guíes d'altu monte, un grupu de montañeros colos que se treslladaron al mirador de Sierra Amor dende onde se ve El Picu Urriellu, cuando se cumple'l 120 aniversariu de la so primer ascensión.

Tamién conocieron el procesu d'ellaboración artesanal del quesu Cabrales. La so manera de dar forma a esti productu de fama internacional sigue siendo la mesma que va sieglos.

Y visitaron una de les cueves nes que les pieces de quesu maurecen, la d’El H.orcadiellu, espacios onde-yos esplicaron cómo'l mugor y la piedra caliar de la que tán formaes y el so altor influyen nes sos característiques finales. Con temperatures siempre per debaxo de los 10 graos y un 98 por cientu d’humedanza, el Cabrales garra’l so sabor peculiar y les especiales característiques tanto de golor, gustu y aspeutu.

Cientos de persones averáronse al apartáu pueblu pa saludar a los reis, la princesa y la infanta, que s'axuntaron con pastores representantes de la ganadería local, colos mayores y los neños del pueblu y visitaron una esposición sobro'l pasáu mineru del pueblu, mines de cinc y plomu qu'emplegaben nos años 70 a unos 40 mineros y que fueron cerraes.

Un llugar al que nun llegó la electricidá hasta 1981, según esplicaron a los reis, que comprobaron tamién los actuales sistemes de collares de xeolocalización qu'usen los propietarios de ganadería caprina pa tener controlaos en tiempu real a los rebaños.

Nel so percorríu, conocieron amás el "chigre" o chigre tienda que rexenta Ana Moradiellos, unu de los pocos establecimientos d'esti tipu que perduren. La so propietaria amosó al rei una fotografía d'Alfonso XII col so bisagüelu, que foi monteru, en Sotres.

Porque Felipe VI ye'l tercer monarca que va a los Picos d'Europa tres les visites que ficieron Alfonso XII y Alfonso XIII. En 1881 y en 1882 Alfonso XII llevó alantre escursión y caceríes pelos Picos d'Europa y tuvo en Sotres y Tielve. Y Alfonso XIII tuvo tamién en delles ocasiones pa practicar la caza.

La Fundación Princesa d'Asturies premió a Sotres por “caltener e impulsar”, nun espaciu d'altu monte, una actividá tradicional de base ganadera estensiva y sostenible, complementada “con una industria agroalimentaria de calidá y col turismu".

Y por caltener un movimientu asociativu puxante y mozu que caltién l'interés pola preservación del patrimoniu, el caltenimientu del paisaxe y la meyora de les infraestructures, y una “notable dinámica sociocultural".